Дзень пісьменства ў Глыбокім

Дзень беларускага пісьменства ў Глыбокім прайшоў у шырокамаштабным фармаце. Шчыра кажучы, здалося, што нават маштабней, чым у Паставах. Нездарма міністр інфармацыі Беларусі Алег Праляскоўскі зазначыў, што з году ў год такое свята праводзіцца ў гістарычных і культурных цэнтрах, з якімі непарыўна звязана жыццё вядомых дзеячаў краіны.

У розныя гады Дзень беларускага пісьменства праходзіў у Полацку, Тураве, Навагрудку, Нясвіжы, Оршы, Пінску, Заслаўі, Мсціслаўі, Міры, Камянцы, Паставах, Шклове, Барысаве, Смаргоні, Хойніках, Ганцавічах. Усе гэтыя гарады валодаюць сваім асаблівым каларытам, і настолькі да свята пераўвасабляюцца.

На Дзень беларускага пісьменства ў Глыбокім завітала шмат ганаровых гасцей. Старшыня нацыянальнага арганізацыйнага камітэта па падрыхтоўцы і правядзенні Дня пісьменства Анатоль Тозік зачытаў прывітанне ўсім удзельнікам свята, якое было накіравана прэзідэнтам Аляксандрам Лукашэнкам. У сваю чаргу намеснік дзяржаўнага сакратара Саюзнай дзяржавы Іван Бамбіза падкрэсліў, што, якую б ролю не ігралі ў сучасным жыцці аўдыёвізуальныя сродкі масавай інфармацыі, кніга ў яе класічным друкаваным выглядзе была і застаецца лепшым і самым надзейным сябрам чалавека, незалежна ад яго ўзросту, выхавальнікам, настаўнікам і памочнікам.

Старшыня Віцебскага аблвыканкама Аляксандр Косінец са сваімі намеснікамі, якія прысутнічалі практычна на адкрыцці ўсіх асабліва важных аб’ектаў, былі вельмі блізка да людзей і гатовы да зносін з імі.

Адкрыццё сквера славутых землякоў-глыбачан адбылося таксама з удзелам губернатара. Творы манументальнага мастацтва, вядомыя ўсяму свету, належаць не толькі мясцовым мастакам. Іосіф Корсак, дарэчы, мецэнат, на сродкі якога ў Глыбокім пабудаваны касцёл кармелітаў, Троіцкі касцёл і іншыя аб’екты. Скульптурныя бюсты , да кожнага з васьмі Аляксандр Косінец падыходзіў з кветкамі, сапраўды ўпрыгожылі горад. Бюсты Язэпу Драздовічу, пісьменніку, мастаку, фалькларысту, археолагу, Ігнату Буйніцкаму – асновапалажэнцу айчыннага тэатра, Алесю Дубровічу – паэту, удзельніку вызваленчага руху ў Заходняй Беларусі, Пятру Казлову –герою Савецкага Саюза, генералу-лейтэнанту, Паўлу Сухому – двойчы герою сацыялістычнай працы, генеральнаму канстуктару авіяцыйнай тэхнікі, дарэчы, на ўрачыстасці адкрыцця прысутнічала яго ўнучка, Вацлаву Ластоўскаму – пісьменніку, гісторыку, першаму дырэктару Беларускага дзяржаўнага музея, Эліэзер Бен-Іегуда – стваральніку дзяржаўнай мовы іўрыт Рэспублікі Ізраіль.

Мемарыяльныя дошкі ў бронзе створаны таксама пісьменніку Лявонцію Ракоўскаму і беларускаму грамадскаму дзеячу 20-30 гадоў ХХ стагоддзя Клаўдыю Дуж-Душэўскаму.

Аўтарамі гэтых аб’ектаў манументальных твораў мастацтва выступілі вядомыя беларускія скульптары Аляксандр Гвоздзікаў, Леў і Сяргей Гумілеўскія, Іван Казак, Валерый Магучы, Іван Міско, Канстанцін Селіханаў, Азат Тарасян, Валерыян Янушкевіч.

А калі адкрывалі гандлёвы цэнтр “Родны кут”, дарэчы, называецца, чамусьці, як і ў нашым Браславе, праўда, гэтая гандлёвая кропка выглядае больш уражвальна, губернатар зазначыў, што такія аб’екты павінны за гэты год з’явіцца і ва ўсіх астатніх раённых цэнтрах.

Урачыстае адкрыццё свята беларускага пісьменства прайшло на цэнтральнай плошчы горада. Нікога не пакінула раўнадушнай тэатралізаваная дзея “Вытокі духоўнасці”, таксама цырымонія ўзнагароджання пісьменнікаў – пераможцаў рэспубліканскага конкурсу на лепшы літаратурны твор-2012 года. Вельмі спадабаліся канцэрт нацыянальнага акадэмічнага народнага хору Рэспублікі Беларусь імя Г. Цітовіча і выступленні творчых калектываў вобласці і замежных гасцей.

Фота Зінаіды Палулех, Аляксандра Азевіча, Гальляша Сялявы
TUT.by

Оставьте комментарий